preskoči na sadržaj

Osnovna škola dr. Josipa Pančića

Login
Kalendar
« Srpanj 2022 »
Po Ut Sr Če Pe Su Ne
27 28 29 30 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31
1 2 3 4 5 6 7
Prikazani događaji

Citat mjeseca

"Najveća nada svake zemlje

leži u primjerenom školovanju mladih."

Erazmo Roterdamski

 

Poštujte naše znakove

Korisni sadržaji

 

 

 

 

 

Brojač posjeta
Ispis statistike od 16. 3. 2014.

Ukupno: 87576
Događanja
Tražilica
 

 

 

 

 

 

 

 

 

KOLO

 

Okupljanje na pozornici (Matko, Dea, Dorotea)

 

MATKO (gleda u nebo): Mili Bože oćel daž?

DEA: Ja ne znan ča j' ovo. Ni kapi daža već skoro misec dan. Ćel ovako celo leto bit?! Zemlja j' sa suha, se će se obisit ča smo posadili. (pogleda u nebo) Ma koda sej' nič naoblačilo, morebit i pade malo daža!

DOROTEA: Pa ča danas da pada! Kad tribamo kolo igrat! Ča van je ljudi?! Se će pokvarit! Jutro neka pade! Jutro ni Petrova!

                       

Kad bi pasal lipanj

                        i petrovsko sunce pripeklo

                        saveti smo prijimali mi dica

                        da nas oće zgodit sunčanica…

                        Onda bi prišla Petrova

                        ringišpilj, krami, sajam,

                        radost nova!

 

MATKO: A vidi gori, nikakov črni oblačić gre!

 

 ( likovi se sklone sa strane i otvore kišobrane)

                                  

Na Učkoj klobučić
črni oblačić. 
Bogzna odkuda j’ dotekal, 
kadi se j’ fantina sve tepa, 
i kot da ga j’ sram, 
da j’ tako mići i sam, 
se j’ razjadil, 
raširil, 
i nebo pokril. 
Zvrnul je kablić
i pal je dažjić. 
Pokle mui pasal morbin, 
nestal je kot dim...

A mat se je jako jadila, 
zač njoj se roba zmočila
ka se va vrte sušila.

( zatvaraju kišobrane, Matko odlazi sa pozornice)

 

DEA: Ajde, daž je brzo prošal! Koda ga ni ni bilo. Sad je samo još vruće!

ANTONIJA: Ej, kaj ura? Samil kasna?

DOROTEA: Ma hodi daj, još ih pol ni prišlo…Ja ne znan ča ti ljudi misle, da ćemo o pol noće kolo igrat!

ANTONIJA: Pa kadi su si?

DEA: Ča se čudiš? Muški su sigurno još na turniri od buć!

ANTONIJA: Ajme meni valjda će finit na vrime!

DEA: Oće, oće…ko ča saki dan na vrime fine!

                       

Saku nedilju od jutra do noće

                        zada birtije igraju buće

                        popiju bocun vina

koštajuć do bulina.

 

Okolo ljudi stari

delaju komentari

ki mogal dobit foru

daj hodil s punti zgoru.

 

Puten prihajaju ženi

s košarun i brimeni

pa kad muža obliče

s puta na njega kriče.

 

Usahle ti se nogi

na ton prokljeton jogi

vrag zel tebe i buće

jutros si odšveril z kuće.

 

A kad već dosta zaškuri

saki se doma žuri

pa kad pride do kuće

po vražju plati buće.

 ANTONIJA: Hodi daj ne sekiraj se! Gremo jednu zapivat    (Višnjičica)

DOROTEA (prema Antoniji): Sil ča načinela danas po kući? Ja samo letin ko muha bez glavi, niš ne stignen!

ANTONIJA: Ma ne divani! Celo jutro na perili robu peren. Niš s ničin, a nis ni puno robi imela nego san tamo videla Mariju Toninu pa smo se malo zadivanele!

DEA: O Marija se zna ča se kadi događa! Ča tij lipoga povidela?

ANTONIJA: Niš previše. Prišal je onaj Ivan z Meriki, znate, od babi Mari sin.

DEA: Ojme meni, pa povidi malo! Jel čemu? Jel ča dolarih prnesal?

 

ANTONIJA:               Celo selo j prišlo Merikanu,

                                   mići Ivan, babi Marin sin

veli j Džon postal, pravi gospodin.

''O yes, all right'' – z svita j prišal

kamo j' šal da bi sriću našal.

 

Baba Mare se j pomladila,

od gole svili mahramicu pokrila,

ku j z svita prnesal Ivan.

Z barilca staru rakiju toči,

pune veselja su nje oči,

tri vinci j smokav na pijat složila,

z belun pogačun sira j ponudila.

Nek svit zna, da j sin prišal,

ki j od mića Ivana – veli Džon postal.

DOROTEA: Sad bi se mogal i ženit. Jel već kakovu našal?

DEA: S toliko dolarih va žepi, neće mu to bit veli problem va ovoj krizi.

ANTONIJA: Veli Marija Tonina da sej va Jelu zagljedal. Znate Jelu, lipa cura, od pokojnog teca Ivi!

DOROTEA: Bome lipo…A dal ona njega gljeda? Bil bi joj dobra prilika! Gospodin z Meriki!

MARTA (dolazi): Ča vi divanite? Kad se gre kolo igrat?

DEA: Čekamo još da si pridu. Pa malo divanimo čaj novoga va Bribiri! Ivan babi Mari j prišal z Meriki pa vele da sej va Jelu zagljedal. Jeli ne bi bilo loše s njin, vele daj puno dolarih z Meriki prnesal i velu karu pripeljal.

MARTA: Niš od toga…Ona samo va Stanu gljeda! I on va nju. To si već znaju…jako su lipi par, vele da bi se mogli zet.

DOROTEA: Od kad to? Nis niš znala!

 

MARTA:         Jele j ranun zorun po vodu šla

na Podorih pod lilak zeleni,

mlada j kot kapljica rosi bila,

lišce belo, obrazi črvljeni.

           

Zvrh Slipice j sunašce rudilo

va lišinah se j beli glog rascval,

z lih i brajad, proliće j dišalo,

na vrili j Stana konji napajal.

 

Čudno j črez grani vetar zašumel,

dva žarka srca su zaigrala,

plave oči su v črne tonule,

tiho se j jedna ljubav rajala.

 

DEA: Ma baš lipo! Fućkaš soldi i dolari. Lipo j kad se niki ovako zaljubi. Nek in je sa srićun.

MARTA: Bome da!

( dolaze svi na pozornicu i sprema se kolo)

ANTONIJA: O fala Bogu! Već je i vrime! Hote ljudi, gremo kolo zaigrat!

DEA (dok se kolo namješta):

                                   Igra kolo spod kuli stare,

va njen igra i staro i mlado.

Zaigralo kolo na srid grada,

Sunce j blizu svojeg zatona,

već pomalo mrak na Bribir pada,

uz zvonki glas večernjeg zvona…

 

 

KOLO

 

Priloženi dokumenti:
kolo igrokaz.doc

preskoči na navigaciju